Мы великій государь Стефанъ Божіею милостію король полскій и великій князь литовскій, рускій, прускій, мазоветцкій, жемотцкій, иөлянскій, княже семиградцкій и иныхъ Ивану Васильевичю Божіею милостію государю всеа Русіи, великому князю владимерскому, московскому, ноугородцкому, казанскому, астороханскому, псковскому, тверскому, югорскому, пермскому, вятцкому, болгарскому и иныхъ. Кого ты, Иванъ Васильевичъ государь и великій князь, пришлешь пословъ своихъ на съѣздъ с нашими послы по лутцкой дорозе от Порхова на Заполскій ямъ межи Порхова и Заволочья, и тѣмъ твоимъ посломъ, сьѣхавшися с нашими послы, о мирномъ постановеньѣ договоръ чинити, а пріѣхати твоимъ посломъ и ихъ людемъ со всѣми ихъ людми и маетностями и назадъ отъѣхати доброволне. Также со всѣми людми и с маетностми безо всякіе зацѣпки и от людей войскъ нашихъ пріѣхати на то мѣсто, сославшися твои послы с нашими послы сьѣдутца, и назадъ отъѣхати со всѣми людми и с маетностями, и хто будетъ твои послы провожали и хто будетъ для осторожности, и тѣмъ всѣмъ людемъ пріѣхати на то мѣсто и отъѣхати со всѣми ихъ людми и с маетностями от людей войскъ нашихъ здорово безо всякіе зацѣпки и убытку водлугъ сего нашего листу, а се нашъ клейтовный листъ посломъ твоимъ, то есть опасную грамоту. Писано в обозе нашемъ подо Псковомъ року от Рождества Христова мѣсяца ноября дни, королевства нашего року -го.